Од 24 до 26 Ноември 2004 година , претставници на неколку Вавилон центри од Македонија, беа гости на младинскиот волонтерски центар во Јагодина, Србија и Црна Гора кој е проектна активност на Друштвото за развој на доброволна работа од Јагодина, кои беа организатори на дводневниот научен семинар на тема "Науката и волонтерите". Групата пристигна во вечерните часови на 24 Ноември 2004 година и беше топло пречекана од домаќините. Наредниот ден, започнувајќи од 7 часот наутро, беше организирана посета на неколку знаменитости - Манастирот "Св. Ѓорѓи Великомаченик" - Врачевшница, истражувачка станица "Петница", а потоа го посети градот Ваљево, кој се наоѓа во близина на Петница. Манастирот е во планинско - пејзажен дел, а таму игуменијата ни одржа интересно предавање за историјата на манастирот. Исто така направивме обиколка на целиот манастирски комплекс во кој ја посетивме и спомен собата со лични предмети на кралското семејство Обреновиќ. Таму се наоѓа и гробницата на познатиот српски учител и преродбеник Сретен Аџиќ каде што пофесорот по историја Нинослав Станојловиќ имаше излагање на тема "Сретен Аџиќ за ликот на учителот".

Потоа заминавме за "Петница". "Петница" (www.psc.ac.yu) е независна и непрофитна организација, наменета за додатно воншколско научно образование на ученици, студенти и наставници, заинтересирани за проширување на знаења во области од природните и општествени науки. Се наоѓа во с. Петница, 7km југоисточно од Ваљево, 99 km југозападно од Белград. Таму од вработените имавме излагање на тема "Ангажирање на средношколците и студентите како волонтери во работата со тинејџери". Во непосредна близина на истражувачкиот центер е Петничката Пештера, археолошки локалитет, стар околу 6500 год., вештачко езеро со површина од 3 ha и спортско рекреативен центар со пливачки базен и терени за спорт и рекреација.

Групата што учествуваше во оваа студиска посета, беше од Вавилон центрите од: Свети Николе ( Ѓорѓиева Рахела - координатор, Богатинов Александар - едукатор по компјутерска техника и Ромевска Јована - волонтерка), Радишани-Скопје ( Ивана и Орхан - волонтери), Ростуше (Алмедина-координатор), Чашка (Горан Андоновси и Биле - едикатори за креативна работа), Струмица ( Бобан Пијанманов - координатор), Куманово (Дафина и Владо - волонтери) и Пролет -Скопје (Стефан Миќич), а беше предводена од Валдета Исмаили од Проектната единица за развој на деца и млади.