Според извештајот „Довербата во институциите и во граѓанското општество во Република Македонија“, Организација на жените на Општина Свети Николе е во ТОП 10 најуспешни граѓански организации во Република Македонија. Први десет граѓански организации кои граѓаните ги наведуваат како успешни се: Црвен крст, Мост, Меѓаши, Ел хилал, СОС Детско село, ФООМ, ЗНМ, Аква, Аман и Организација на жените на Свети Николе.

Во овој извештај се анализирани наодите од анкетата „Довербата во институциите и во граѓанското општество во Република Македонија“, кои се однесуваат на граѓанското општество, а која беше спроведена по петти пат на национален репрезентативен примерок на граѓаните на Република Македонија. Целта на истражувањето беше да се испита довербата на граѓаните во институциите и во граѓанското општество.

Оваа година извештајот е нарачан од страна на проектот „Техничка поддршка за граѓанските организации (ТАКСО)“, финансиран од Европската Унија (ЕУ), а е подготвен од Македонскиот центар за меѓународна соработка (МЦМС). МЦМС и Македонската канцеларија на ТАКСО му ја доверија анкетата на јавното мислење, врз којашто се базира овој извештај, на М-проспект, чија одговорност беше и методолошката исправност на анкетата. Повеќе информации за МЦМС и ТАКСО се дадени на крајот од извештајот.

Истражувањето ги опфати општото познавање на граѓанските организации, познавањето организации кои работат во конкретни области и на триесет и една граѓанска организација. Познавање на граѓанските организации Граѓаните беа запрашани да наведат една или повеќе успешни граѓански организации, т.е. организации кои според нивното мислење се активни и постигнуваат резултати.

Графикон II.1. (страна 15 во извештајот)
Препознаени граѓански организации како успешни

Мнозинството од граѓаните (53,8 %) знаат да наведат успешна граѓанска организациja, слично како и во 2010 г. (52,6 %). Вкупно се препознаени околу 80 конкретни граѓански организации најмалку од еден граѓанин. Први десет граѓански организации кои граѓаните ги наведуваат како успешни се: Црвен крст, Мост, Меѓаши, Ел хилал, СОС Детско село, ФООМ, ЗНМ, Аква, Аман и Организација на жените на Свети Николе. Пет од овие организации беа наведени како најуспешни и во 2008 и во 2010 година (Црвен крст, Мост, Меѓаши, Ел хилал и ФООМ).

Познавањето граѓански организации кои дејствуваат во осум конкретни области е истражувано барајќи од испитаниците спонтано да наведат три организации кои придонесуваат во истите. Истражувано беше познавањето на граѓанските организации, кои дејствуваат во областите: Борба против сиромаштијата; Развој на малите и средните претпријатија, економски развој, вработување (понатаму: економски развој); Локалниот и руралниот развој; Развој на демократијата и човековите права; Борба против корупцијата; Јакнење на граѓанското општество; Градењето мултикултурно општество; и, Процесот на интеграција во ЕУ. Во 2013 г. малцинство граѓани знаат да наведат организации кои дејствуваат во овие осум области, што е подобро од минатите истражувања, кога мало малцинство (под 30 %) можеа да наведат конкретна организација. За забележување е дека граѓаните како субјекти кои најмногу придонесуваат во одредени области наведуваат и некои од државните институции, и покрај тоа што од испитаниците е побарано да наведат граѓанска организација.

Извештајот можете да го погледнете на следниот линк:

http://mcms.org.mk/images/docs/2013/doverbata-vo-graganskoto-opstestvo-2013.pdf

Организација на жените на општина Свети Николе