МАКЕДОНСКИТЕ ВОЛОНТЕРИ ВО ВОЛОНТЕРСКА АКЦИЈА ЗАЕДНО СО НБА ЅВЕЗДИ

Во периодот од 4 до 14 Август во Чатеж, Словенија се одржа Меѓународна Младинска Волонтерска Школа. Учесници беа млади волонтери (на возраст од 15 до 18 години) од шест балкански земји: Македонија, Словенија, Србија, Босна и Херцеговина, Косово и Албанија. Меѓу нив бевме и ние Марија Николова, Ирена Ордева, Душан Петров, Христина Коцева и Благица Ивановска, предводени од нашиот ментор Александар Богатинов.

Нашето присуство на оваа Волонтерска Школа беше овозможено од Организацијата на жените на општина Свети Николе, финансирано од Амбасадата на Соединетите Американски Држави во Република Македонија, а одговорни за реализација на школата беа Словенска Филантропија, односно Центарот за промоција на волонтерската работа од Љубљана. Наши тренери на школата беа Души Кумер, Вахида Хузејровиќ и менторите од сите гореспоменати земји.

На оваа младинска волонтерска школа, ние-волонтерите научивме како да ја преземаме улогата на промотори и организатори на волонтерската работа помеѓу младите во нашата средина. Исто така, ние како волонтери разменивме различни искуства за нашата волонтерска работа. Истовремено, научивме едни од други повеќе за своите култури и надминавме многу стереотипи. Сите волонтери преку работилниците, културните-уметничките активности, спортските и рекреативните активности и социјалните игри, заеднички сплетовме меѓународна мрежа на млади волонтери создавајки простор за идна соработка.

Претпладневните работилници ни беа на теми: „Волонтерската работа во денешнината“, „Организација и менаџмент на волонтерската работа“, „Промоција на волонтерството и соработка со медиумите“, исто така имавме богати дискусии на следниве теми: „Што јас правам како волонтер и што прават волонтерите во моето училиште“, „Јас како волонтер, моите добри искуства, лоши искуства и што добив од тоа“, „Мотивација за волонтерската работа“, „Што треба да направиме кога ќе се вратиме дома: планирање на идни активности“.

Ние волонтерите, работевме во групи на различни предлог-проекти и ја преставувавме нашата волонтерска работа.

Во попладневните часови имавме разновидни активности: спортски активности (кошаркарски турнири, тенис, пинг–понг), креативни работилници (изработувавме маски, накит, заедничко знаме на кампот, печатевме маици со натпис „100 % Волонтер“) и игравме различни друштвени игри.

Благодарение на организаторите на школата имавме неповторлива шанса да учествуваме во волонтерска акција на NBA Cares “Make a difference Day” ни помалку ни повеќе туку со вистински НБА ѕвезди !!!

Имено, ние-волонтерите, уште еднаш ја покажавме нашата хуманост на дело во волонтерската акција во Основното Училиште „Ливада“ во Љубљана, заедно со НБА легенди од поранешните југословенски простори, како што се Владе Дивац, Жарко Паспаљ, Рашо Несторовиќ, Предраг Дробњак, Драган Тарлач и други НБА играчи како и актуелни НБА тренери. Заедно со нив ги бојадисувавме ѕидовите, игралиштата, поставивме нови клупи, засадивме нови дрва... На кошаркарите им дадовме подршка и во спортската сала Тиволи во Љубљана каде што верно навивавме на ревијалните натпревари. Двајца од волонтерите се покажаа како успешни идни кошаркари и добија награда за тоа.

http://www.nba.com/home/bwb/europe_day_two_recap_110809.html