Организација на жените на општина Свети Николе во партнерство со Центар за развој и едукација од Свилајнац-Србија, Независно здружение на млади Лепоглава-Хрватска,Словенска Филантропија Љубљана-Словенија, Младински центар Херцег Нови-Црна Гора, Друштвото на Словенците во Р.Српска ,,Триглав,, Бања Лука-Босна и Херцеговина и Граѓаните во акција од Приштина-Косово го реализираа проектот “Различни бои една игра - со спорт против расизам и дискриминација 2 “, финансиски подржан од Европска Младинска Фондација при Советот на Европа. Цел на проектот е придонес во надминување на предрасудите и стереотипите на спортските терени.

Награден конкурс за литературни и ликовни творби на тема „Различни бои една игра, со спорт против расизам и дискриминација“ беше објавен во сите седум партнерски градови и беше наменет за млади од 13 до 18 години од основните и средните училиштата од овие градови. За првите три места и од литературниот и од ликовниот конкурс беа доделени парични награди во висина од 100, 70 и 50 евра. Од наградените творби се подготви и испечати каталог кој потоа беше дистрибуиран во текот на караванот. 8 волонтери на Организација на жените на општина Свети Николе на 26 Април од Свети Николе тргнаа на патувачки караван кој продолжи низ градовите на партнерските организации се до 5 Мај. Во рамките на караванот се реализираа низа на активности. Се одигра перформанс кој беше подготвен и изведен од волонтерите од Организација на жените на општина Свети Николе, се делеа флаери и каталози, се организира ликовна изложба со сите пристигнати ликовни творби на конкурсот и се одржа литературно читање на трите наградени творби.

Во Бања Лука Р. Босна и Херцеговина се одржа завршната манифестација на која учествуваа по двајца волонтери од сите партнерски организации. Овде покрај другите активности се одигра фудбалски натпревар со мешани тимови по пол, возраст и националност и се одржа заедничка интеркултурна вечер на која учесниците ги презентираа своите држави, градови и организациите и се запознаа со останатите земји учеснички вкусувајќи разна традиционална храна и пијалоци. За текот и програмата на караванот, беа информирани сите амбасадори на Македонија во земјите учеснички, претставници на локалните самоуправи, здруженија на Македонци во тие земји, локални училишта и др.

Проектните активности беа заокружени со ретроспектива - презентацијата на реализираните активности во текот на патувачкиот караван во Домот на културата „Крсте Мисирков“ во Свети Николе. Оваа, како и дел од останатите активности беа медиумски покриени од локалните медиуми со што за проектот имаше можност да се запознае и пошироката јавност.

После поминатите 21 граница, 7 држави, 14 градови, 3000км, надминувајќи ги проблемите и сеќавајќи се на убавите моменти успеавме да ја постигнеме целта која ја поставивме пред почетокот на караванот и со позитивен дух продолжуваме понатаму...