Во рамките на Организација на жените на општина Свети Николе од 1 март 2010 година функционира Центар за набљудување на работата на локалната власт. Овој Центар е дел од проектот „Проект на USAID за транспарентно владеење 2009-2012г.“ кој е во реализација на НВО Инфоцентар, Центарот за граѓански комуникации и ЕХО. Цел на проектот е придонес кон заживување на механизмите за транспарентност, одговорност и отчетност на локалните власти, кон зајакнување на учеството на граѓаните во донесување на одлуки на локално ниво, како и кон размената на добри практики меѓу локалните самоуправи на национално ниво. Проектот се реализира во три фази: пилот фаза во која се опфатени 4 општини од источна Македонија: Штип, Струмица, Виница и Свети Николе, втора фаза во која добрите практики и искуства од претходно споменатите општини ќе се пренесат во неколку скопски општини и мултиетнички заедници во други делови од Македонија и во третата завршна фаза ќе биде организирана Национална конференција посветена на одговорноста на локалните власти и антикорупциските практики. Во пилот фазата која е во тек прво беа спровдени истражувања за практиките во локалната заедница, преку кои се идентификуваа слабостите и недостатоците на јавното менаџирање, граѓанското вклучување во работата на локалните власти, а исто така и задоволството на граѓаните и бизнис секторот од локалното управување и услугите на локалните служби.

На 16.03.2010 година во салата на општина Свети Николе , беше одржана јавна дебата во Свети Николе на која беа изнесени резултатите од истражувањето за актуелните практики во нашата општина , анкетите беа спроведени во месец Декември 2009 година.

Во оваа фаза во месец Март се воспоставија и функционираат Центри за набљудување на работата на локалната власт, во Штип, Струмица, Свети Николе и Виница. Центарот во Свети Николе е во рамките на Организација на жените на општина Свети Николе и претставува клучна точка за мерење на задоволството на граѓаните од услугите на општинските служби.

Во општинската зграда и во Организацијата има поставено и сандачиња за поплаки, пофалби, предлози и мислења во врска со работата на Локалната самоуправа-Свети Николе и институциите/организациите во нејзина надлежност.

Организација на жените на општина Свети Николе