Локална самоуправа Свети Николе со средства од буџетот на општина Свети Николе, наменети за здруженија на граѓани и оваа година, финансиски ги поддржа проектните активности на ОЖОСВН наменети за групата за самопомош на жени заболени и лекувани од малигни заболувања од општина Свети Николе.

Целта на проектните активности е зајакнување на самодовербата на жените од групата за самопомош и полесно надминување на траумите и последиците од болеста со која што се соочиле, преку давање стручна психосоцијална и здравствена помош и креативно исполнување на слободното време. Во рамките на проектните активности за 2017 година предвидено е одржување на 10 едукативни и креативни работилници, како и две посети на верски објекти во Р.Македонија односно рекреативни работилници и веронаука. Психосоцијалната и здравствената помош и подршка се состои во пружање едукативни совети на разни теми: здрава храна, здрав стил на живеење, интеграција во заедницата, надминување на стравови итн. Во реализирање на едукативниот дел се ангажирани стручни лица: нутриционист, доктор, психолог, како и едукатор за креативни работилници.

Целна група се сите жени од општина Свети Николе кои се заболени и лекувани од малигни заболувања и имаат потреба од повторна ресоцијализација, интеграција и поддршка во надминувањето на стресот, траумите и последиците од болеста.

Покрај едукативните и креативни работилници, со проектот предвидува и одржување на трибина за подигање на свеста, набавка на ортопедски медицински помагала, како и рекреативни екскурзии за неформално дружење на жените од групата и посета на верски објекти во Р.Македонија.

Во оваа група може да се приклучи секоја заинтересирана жена која има проблем со малигни заболувања, групата е од затворен тип односно на барање на членката на групата нема да се открива нејзиниот идентитет надвор од групата, а исто така постои и можност за индивидуални средби со жените кои воопшто не сакаат да се знае нивниот идентитет и во рамките на групата.

Во досегашното функционирање на групата особено се евидентни позитивни резултати кај членките на групата и затоа ОЖОСВН и во иднина ќе продолжи да работи на унапредување на положбата на жените од групата во општеството преку придобивките стекнати од едукативните работилници.