На 25 Март 2006 во с. Црнилиште се одржа работилница со тема Родови односи и развој во рамките на проектот Унапредување на здравјето на жените 2 финасиран од Шведската фондација КВИННА ТИЛЛ КВИННА. Целта на работилницата е подигање на свеста кај жените од руралните средини за родовите односи и различната положба која ја имаат мажите и жените во заедницата. На работилницата присуствуваа 25 жени од с.Црнилиште на возраст од 20 -50 години.

Програмата беше распоредена во три пооделни сесии .

Првата сесија беше “Социјално потекло на родовите односи”. На почетокот се започна со дискусија околу тоа каква е разликата меѓу термините Пол и Род. Доминатно беше дека поголем дел од жените сметаат дека мажот секогаш го преферира машкото дете, па и тие мора да се согласат со тоа. Од друга страна забележано е дека машкото има помалку обврски , останува во семејството и е помалку изложено на некои непријатни ситуации и не може да биде жртва на насилство. Аргументите за посакуваното женско дете е дека тоа помага во домот , полесно се комуницира се женското дете и мајката може повеќе да се довери , полесно може да ги разбере проблемите на мајката и секогаш може да даде помош на родителите.

Во втората сесија се обработуваа “Родовите односи, стереотипи , норми и вредности во општеството”. На почетотот се даде краток осврт на тоа што се стеротипи , норми и вредности на однесување.Стереотипите се доста доминантни посебно во малите рурални средини и дека многу влијаат врз животот на жените. Жените многу ретко се обидуваат да работат работи кои се типично « Машки » Една од учесничките изјави дека таа сака да оди на риболов, но дека секогаш е ограничено од тоа што ќе каже средината . . Однесувањето на девојчињата кои не се во согласност со очекувањата на родителите многу повеќе се осудува. Од девојчињата се очекува да бидат вредни послушни и да помагаат дома. Доколку не го прават тоа се осудени и од родителите и околината .

Третата сесија се однесуваше за “Родово/половата поделба на трудот”. На почетокот се забележа дека постои поделба на работата која ја извршуваат жените, а која работа ја извршуваат мажите. Жените истакнаа дека во селата постои стриктна поделба посебно на женската работа, но дека жените завршуваат и голем дел од машката работа како цепење дрва , па и дел од тешките физички работи во земјоделието. Скоро сите жени беа невработени, па така скоро целата репродуктивна работа ја извршуваат самите , а учествуваат и во обработката на земјата и одгледување на добитокот и живината. При тоа се забележа дека нивниот труд не се вреднува адекватно и дека многу ретко учествуваат во одлучувањето за заработката од земјоделието. Беше забележано дека жените воопшто не се присутни во месните одбори и се исклучени од сите општествени настани во селото. Решавањето на прашањата на заедницата е оставено во рацете на мажите. Жените воопшто не се вклучени како активни чинители во политичкиот живот. Работилницата беше спроведена од едукаторката Радмила Сандева.