Меѓународната младинската размена “LET’S BE ACTIVE IN EUROPE”

Од 13 до 21 Јули 2009 година како претставници на Организација на жените на Општина Свети Николе група од 7 млади учествуваа на меѓународната младинската размена “LET’S BE ACTIVE IN EUROPE” која се одржа во близина на Кладово, Србија во организација на Центарот за ненасилен отпор од Белград, Србија и со финансиска подршка од Европската Комисија-Генерален Директоријат за Едукација и Култура Програма “Млади”. Групата млади кои ја претставуваа Организацијата на жените на општина Свети Николе и Република Македонија ја сочинуваа: Ивица Наумов, Душица Горгиева, Благој Митевски, Мерсиха Дурмишева, Ангелче Мишев, Гордана Горгиева , а водач на групата беше Александар Богатинов. На оваа младинска размена учествуваа млади од Македонија, Италија, Србија, Франција и Полска.

Главна тема на младинската размена беше Европа видена преку меѓукултурниот дијалог, Активното учество на младите и заедничките вредности на сите Европјани. Исто така тема на размената беше и спортот и како да се искористи спортот како алатка за креирање на дијалог и поголемо активно вклучување на младите луѓе.

Во претпладневните сесии младите зедоа активно учество на следните работилници: Европски вредности и идентитет, Меѓукултурен дијалог, Европско граѓанство и Активно младинско учество.

Во попладневните работилници младите спортуваа (по нивна желба) во еден од следните спортови: кошарка, одбојка, пливање, спортско качување на карпи, пинг-понг.

Вечерните часови беа резервирани за претставување на државите учеснички на младинската размена. Македонската група ги надмина очекувањата на сите присутни и се претстави во несекојдневно ОДЛИЧНО светло. Македонија ја претставивме најдобро што можевме и верувајте ми таа вечер прекрасно беше чуството да се биде МАКЕДОНЕЦ !!! Националните вечери помогнаа многу да се научи повеќе за другите и да се надминат многу предрасуди и стереотипи.

Исто така на младите им се пружи уникатна можност да посетат многу археолошки локалитети во околината на Кладово, ги  посетија и  градовите Кладово и Белград,  имаа можност да ја посетат најголемата хидроцентрала во поранешна Југославија - Ѓердап,  како и да крстарат со брод по Дунав и Сава .

Оваа осумдневна младинска размена преку разни методи на неформалното образование им понуди можности на младите од разни земји и од разни културни средини полесно да ги идентификуваат заедничките вредности и со тоа полесно да ги надминат предрасудите и стереотипите кои претходно ги имале. Работилниците беа така дизајнирани за да им помогнат на младите како да се стекнат со поголема самодоверба (како идни млади лидери) и како да бидат активни граѓани и да се вклучат поактивно во случувањата во нивните локални заедници (без разлика дали се “малцинство” или “мнозинство”), притоа да можат да ги искажат своите погледи и верувања.

Младите беа охрабрени стекнатите знаења и искуства од младинската размена да ги презентираат пред своите врсници во своите средини и да ги охрабрат и нив во блиска иднина да се вклучат во слични Европски активности во кои Организацијата на жените на Општина Свети Николе е вклучена повеке од 4 години.

Најважно од се е тоа што младите од различни културни средини и држави стекна нови пријатели кое пријателство се надевам ќе биде долго и ќе прерасне во идни соработки .

Александар Богатинов
Организација на жените на општина Свети Николе